काठमाडौँ । पूर्वप्रधानमन्त्री तथा नेकपा एकीकृत समाजवादी पार्टीका अध्यक्ष माधवकुमार नेपाललाई विशेष अदालतले तारेखका लागि साउन १३ गते बोलाएको छ ।
पतञ्जली योगपिठ तथा आयुर्वेद कम्पनीसँग सम्बन्धित जग्गा हिनामिना प्रकरणमा थुनछेक बहसपछि उनी बुधबार ३५ लाख रुपैयाँ धरौटी बुझाएर छुटेका छन् ।
गत जेठ २२ गते अख्तियार दुरुपयोग अनुसन्धान आयोगले पूर्वप्रधानमन्त्री नेपालसहित ९३ जनालाई विपक्षी बनाउँदै हदबन्दीभन्दा बढी जग्गा कम्पनीका नाममा बिक्री वितरण गर्न दिई भ्रष्टाचार गरेको अभियोगमा मुद्दा दायर गरेको थियो ।
भ्रष्टाचार मुद्दा दायर भएपछि पूर्वप्रधानमन्त्री नेपाल बुधबार आफैँ अदालतमा उपस्थित भएका थिए । बयान र थुनछेक बहसपछि धरौटीमा छाड्दै विशेषले नेपाललाई तारेख म्याद थमाएको छ ।
तारेख मितिपछि मुद्दाको विषयगत सुनुवाइका लागि पेसी तोकिनेछ ।
