चितवन । त्रिशूली नदीमा बेपत्ता दुई बस र यात्रुको खोजी आज पनि जारी छ ।
नेपाल भारतका संयुक्त सुरक्षा फौजबाट खोजतलास चलिरहे पनि अहिलेसम्म बेपत्ता बस र बाँकी यात्रुको बारेमा पत्ता लाग्न सकिरहेको छैन । ६ दिन अघिदेखि सशस्त्र प्रहरी बल नेपालको गोताखोरसहित छिमेकी राष्ट्र भारतको राष्ट्रिय आपदा मोचन बलबाट १२ जनाको प्राविधिक टोलीले संयुक्त रुपमा खोजी गरिरहेको छ ।
सशस्त्र प्रहरी बल नेपालका केन्द्रीय सहप्रवक्ता, प्रहरी नायब उपरीक्षक शैलेन्द्र थापाकाअनुसार सिमलतालदेखि भारतीय सीमा क्षेत्र गण्डक ब्यारेजसम्मै विभिन्न क्षेत्रबाट टोली परिचालन गरेर खोजी भइरहेको छ । गत शनिवार चितवन आइपुगेको भारतीय प्राविधिकसहितको टोलीले आइतवार बिहानदेखि खोजी थालेको थियो ।
दुई हप्ताअघि असार २८ गते नारायणगढ–मुग्लिङ सडकखण्डको सिमलतालमा भएको दुर्घटनामा हराइरहेका यात्रुमध्ये अहिलेसम्म २४ जनाको शव भेटिएको छ ।
दुई बसमा रहेका ६५ जनामध्ये तीन जना सकुशल निस्किएका थिए भने ६२ जना बेपत्ता भएका छन् । दुई बससँगै ३८ यात्रुको अवस्था अहिलेसम्म पनि पत्ता लाग्न सकेको छैन ।
